20.600 parados
Recentemente Eurostat (http://ec.europa.eu/eurostat) publicaba as listaxes das rexións europeas con máis paro e nos primeiros lugares aparecían Andalucía,Canarias, Ceuta, Estremadura, Castela a Mancha e Melilla con porcentaxes que ían do 28.4 ao 34.8%. Nos caso de mozos parados (de 15 a 24 anos) tamén as rexións españolas aparecían nos primeiros lugares: Ceuta, Andalucía, Castela a Mancha ou Canarias con porcentaxes que ían do 57.4 ao 67.5%.
Os datos da EPA (http://www.ine.es/daco/daco42/daco4211/epa0115.pdf) correspondentes ao primeiro trimestre de 2015 foron decepcionantes para todos os analistas e nin os membros do goberno puideron evitar sinais dedecepción ás portas das eleccións municipais e autonómicas. Destruíronse114.300 postos de traballo, a taxa de paro sobe ao 23.78% e cae a poboación activa en 127.400 persoas. Por seguir cos datos negativos: medra a taxa deparcialidade, o paro feminino e o número de fogares con todos os seus membros en paro.
Galiza sitúase entre as comunidades nas que máis aumentou o paro (11.900) xunto con Valencia e as Illas Baleares. No concello da Coruña o paro sobe un0.9%, como recoñece a concelleira de emprego e empresa, chega ao 17.5% exa afecta a 20.600 persoas.
Parece evidente que se os nosos gobernantes confiaban nos datos económicos para remontar as súas previsións electorais a cousa non lles vai ben. Así tamén se explica que nas enquisas na Coruña o PP perde a maioría absoluta de que agora dispón.
O espectáculo que ofrecen os casos de corrupción protagonizados por onte ilustres figuras da política española dos últimos decenios permite pensar dúas cousas: que a política económica foi errática e que os que debían direccionala correctamente non o fixeron.O día 24 de maio saberemos cantos cidadáns votan por outras políticas orientadas a defender as persoas e os seus dereitos, a mudar a estrutura do noso desenvolvemento económico e a castigar severamente unha corrupción que nos empobrece e avergoña. Dentro e fóra do país.